Misteri Bukit Tempayan Pisang 2

Cerita ani terjadi kira-kira dalam dua puluh tujuh tahun yang lalu. Sebab apa cerita ani berlaku batah sudah ialah kerana masa atu penduduk perumahan disini baru saja di pindahkan kemari. Masa atu balum ada pokok-pokok yang basar nampak jua rumah jiran alat lima ke enam buah rumah, bayangkan saja perumahan yang baru siap masa ani. Jadi pemandangan kampong masa atu masih luas, kalau dillihat dari jauh nampak banyak rumah dan berlatar belakangkan sebuah bukit yang dinamakan Bukit Tempayan Pisang.
Kejadian ani terjadi kepada salah seorang jiranku Didi(bns). Masa atu peumurannya dalam 16 tahun. Ada satu petang atu si Didi ani menolong mamanya membersihkan halaman rumah bisdurang ani. Abis segala rumput di mesinnya, bawah rumah di siramnya tautah baru-baru pindah rumah ani mesti tah jua dibersihkan.
Waktu atu hari pun sudah semakin senja, mamanya mengarahkan si Didi ani beranti membersihkan halaman rumah esuk tah lagi menyambung. Si Didi ani pun paham jua ya kan arahan mamanya ani pasal hari sudah semakin senja. Disebabkan kengalihan bekerja membersihkan tadi, si Didi ani berehat tah ya dulu duduk di tangga rumahnya ani.
Entah semana-mana terlelap ya sekajap di tangga atu, barangkali pasal kengalihan tambah tah lagi duduk di tangga angin sepoi-sepoi, iatah membagi tetidur atu kali. Setelah si Didi sedar dari tidurnya ia merasa macam ada sesuatu mengajutkan kedia. Dibukanya saja matanya tertoleh ya keatas dan dilihatnya ada sebuah bahtera yang sangat basar terapung melintasi diatas rumah orang-orang disini. Bahtera atu dilihatnya seolah-olah turun daripada Bukit Tempayan Pisang pasalnya rumah si Didi ani menghadap bukit atu dan bahtera atu menuju kelaut. Untuk pengetahuan, kedudukan kampong ani inda jauh dari laut. Jadi si Didi ani kehairanan dengan apa yang dilihatnya ani. Menurut dari apa yang diceritakan, si Didi ani sampat meliat diatas bahtera atu ada tujuh orang bini-bini yang lawa melambaikan tangan arahnya. Barangkali iatah tujuh urang puteri atu,nada siapa yang tahu. Lepas atu si Didi ani memanggilnya mamanya kedalam sekajap kan membagitau apa yang dilihatnya sekali sudah ya keluar semula di lihatnya inda lagi ada bahtera atu.
Sesudah ia meliat kejadian atu si didi damam pada keesokkan harinya mau jua dalam dua minggu ia damam atu. Sejak dari atu nada lagi si Didi ataupun orang-orang di kampong ani terlihat atau mendengar apa-apa cerita pasal bahtera atu.